Barish hui to phulon ke tan chak ho gaye – Parveen Shakir

Barish hui to phulon ke tan chak ho gaye

mausam ke hath bhig ke saffak ho gaye

baadal ko kya khabar ke barish ki chah main

kitne buland-o-bala shajar khaak ho gaye

jugnu ko din ke waqt pakarne ki zid karen

bache hamare ahad ke chalak ho gaye

lahra rahi hai barf ki chadar hata ke ghas

suraj ki shah pe tinak bhi bebak ho gaye

suraj dimag log bhi iblag-e-fikr main

zulf-e-shab-e-firaq ke pechak ho gaye

jab bhi garib-e-shahar se kuch guftagu hui

lahaje hawa-e-sham ke namnak ho gaye

sahil pe jitne aab_guzida the sab ke sab

dariya ke rukh badalte hi tairak ho gaye

By: Parveen Shakir

(Chaak = Torn ; Saffak = Cruel) (ahad = times) ( aab_guzida = scared of water ; Tairak = swimmers)